प्रभात वृत्तसेवा
पिंपरी – पिंपरी चिंचवड महापालिकेच्या सार्वत्रिक निवडणुकीसाठी आरक्षण सोडत जाहीर झाल्याने राजकीय चित्र स्पष्ट झाले आहे. त्यामुळे सर्वच पक्षातील इच्छुकांनी तिकीट मिळविण्यासाठी सेटिंग लावण्यास सुरूवात केली आहे. इच्छुकांनी गाठीभेटी सुरू केल्या असून प्रभागात पॅनलमध्ये कोण-कोण उमेदवार राहणार याबाबत जुळवणीला वेग आला आहे.आगामी महापालिकेच्या निवडणुकीसाठी नगरसेवकांची संख्या १२८ असणार आहे.
शहरातील ३२ प्रभागातून यासाठी हजारो इच्छुक गुडघ्याला बाशिंग बांधून तयारी करत आहेत. १२८ नगरसेवकांच्या जागांपैकी ५० टक्के जागा महिलांसाठी राखीव आहेत. त्यामुळे ६४ नगरसेविका आणि ६४ नगरसेवक आहेत. अनुसूचित जातीसाठी (एससी) २० जागा, तर अनुसूचित जमातींसाठी (एसटी) ३ जागा आरक्षित आहेत. तसेच ओबीसींसाठी ३४ जागा राखीव आहेत. तर यामध्ये महिलांसाठी एससी अंतर्गत १० जागा, एसटीमध्ये २ आणि ओबीसीमध्ये १७ जागा महिलांसाठी राखीव आहेत.
याशिवाय सर्वसाधारण जागांमध्ये ३५ जागा महिलांसाठी आहेत. सोडतीमुळे हे चित्र स्पष्ट झाले आहे. त्यामुळे सर्वच पक्षांतील इच्छुकांनी निवडणूक लढवण्याचा प्रभाग क्रमांक निश्चित केला आहे. त्यादृष्टीने सेटिंग लावण्यास सुरुवात केली आहे. पक्षातील वरिष्ठ नेत्यांच्या गाठीभेटी सुरू झाल्या आहेत.राष्ट्रवादी काँग्रेस अजित पवार पक्षाने स्वबळावर तयारी सुरू केली असून अर्ज मागविण्यास शुक्रवारपासून सुरूवात होणार आहे.
तसेच अजित पवार गट व शरद पवार गट एकमेकांना टाळी देत एकत्र येण्याची शक्यता दाट आहे. तर भाजपाने देखील स्वबळासाठी चाचपणी केलेली आहे. भाजपा, शिंदेसेना आणि रिपब्लिकन पार्टी ऑफ इंडिया हे महायुती म्हणून लढण्याची शक्यता आहे. तर अद्याप उद्धवसेना आणि काँग्रेसला सूर सापडत नसल्याचे चित्र आहे. या सर्व गोष्टींचा विचार करून प्रभागामध्ये कोणा-कोणाला पॅनलमध्ये घ्यायचे, याची जुळवाजुळव सुरू झाली आहे.
अनेकांनी काढले कुणबी दाखल्याचे शस्त्र..
प्रभागामध्ये एक जागा नागरिकांचा मागास प्रवर्ग (ओबीसी) आणि एक जागा अराखीव अशी आहे. त्यामुळे खुल्या गटातून निवडणूक लढवणाऱ्यांनी कुणबी दाखल्याचे शस्त्र बाहेर काढले आहे. शहरातील बहुतांश राजकीय पदाधिकारी व इच्छुकांनी कुणबी दाखला काढलेला आहे. तयारी केलेल्या प्रभागामध्ये ओबीसी आरक्षण पडल्यास कुणबी प्रवर्गातून लढायचे, तसेच ओबीसी महिला आरक्षण पडल्यास पत्नीला किंवा घरातील महिलेला लढवायची तयारी अनेकांनी केली आहे. अनुसूचित जाती, सर्वसाधारण महिला, ओबीसी, अराखीव यामध्ये कोण-कोण कसे लढणार याची जुळवणी करून ती वरिष्ठांसमोर सादर केली जात आहे. त्यातून तिकीटासाठी आग्रह धऱला जात आहे.
आता माघार नाही..
प्रभागामध्ये अनेकांनी आता माघार घेणार नसल्याच्या आशयाचे फ्लेक्स झळकवण्यास सुरूवात केली आहे. काहीही करून पॅनलमध्ये स्थान मिळविण्यासाठी आमदार, खासदार, शहराध्यक्ष यांच्यासह मुंबईतील नेत्यांकडे इच्छुकांची रांग लागली आहे. तिकीट न मिळाल्यास आता नाही तर कधीच नाही म्हणत अनेकांनी अपक्ष लढण्याचा निर्धार केला आहे. इच्छुकांच्या वाढत्या हालचालींनी शहराचे राजकीय रण तापू लागले आहे.
The post PCMC Election : तिकीटासाठी सेटिंग अन पॅनलच्या जुळवणीला वेग; पक्षांतर्गत हालचालींना गती appeared first on Dainik Prabhat.
Welcome to Mhnokari.in – a trusted platform committed to providing the latest, most accurate, and verified updates on government jobs, exam results, admit cards, recruitment notifications, and career opportunities across Maharashtra India. Our team prioritizes thorough research, strict fact-checking, and clear presentation to ensure every user receives reliable, easy-to-understand, and trustworthy information.
